BASES
"V XORNADAS DE DANZA E MÚSICA TRADICIONAIS GALEGAS"


1-. A Concellería de Festas e Animación Sociocultural do Concello de Vigo organiza, en colaboración coa asociación cultural "Interfolc", as V Xornadas de Danza e Música Tradicionais Galegas, que terán lugar no teatro-sala de concertos do Centro Cultural Caixanova, os días 1, 2 e 16 de novembro, a partir das 20'00 horas.

2-. Nestas xornadas poderán inscribirse todas aquelas agrupacións de danza e música galegas que o desexen e que pertenzan a unha entidade legalmente constituída, sen ánimo de lucro. O grupo terá obrigatoriamente un mínimo de seis parellas mixtas no escenario, e os seus compoñentes deberán ser maiores de 15 anos. Neste sentido o xurado poderá requiri-la presentación dalgún documento de identificación de calquera dos/as participantes.

3-. A solicitude de inscrición poderá realizarse ata as 13 horas do día 20 de outubro de 2003, cubrindo o impreso que poderán solicitar na Escola Municipal de Danza do Concello de Vigo, en horario de luns a venres, de 10 a 12 horas e de 19'00 a 22'00 horas. As solicitudes poderán entregarse persoalmente ou ben remitilas por correo ou fax á citada escola (praza do Rei, s/n; CP 36202; teléfono/fax: 986.81.01.67). Non se admitirá ningunha solicitude que se reciba con posterioridade á hora e data indicadas, calquera que sexa o motivo do atraso.

4-. O comité organizador das xornadas seleccionará entre tódalas solicitudes recibidas un total de 12 agrupacións, e se terán en conta os seguintes criterios: calidade do grupo, experiencia nacional e internacional, participación noutros certames ou festivais, premios obtidos, número de compoñentes... O día 1de novembro actuarán seis agrupacións e o 2 outras seis. O día 16 terá lugar a final das xornadas.

5-. As agrupacións participantes comporanse necesariamente de corpo de baile e grupo de acompañamento, e vestirán todos eles o traxe rexional. Ningún bailarín ou grupo de acompañamento poderá tomar parte nas xornadas con máis dunha agrupación; este será motivo de descualificación para as agrupacións implicadas.

6-. Cada agrupación seleccionada bailará dúas danzas, cunha duración máxima de 5 minutos cada unha delas, e que deberán indicar no impreso de solicitude de inscrición, xunto co seu historial completo e detallado; non poderán ser cambiadas sen consentimento do comité organizador. As agrupacións que se clasifiquen para a fase final deberán cambiar unha das pezas obrigatoriamente.

7-. A orde de actuación das doce agrupacións seleccionadas decidirase mediante sorteo público ( ó que poderá asistir un representante por cada grupo) que se realizará o martes 31 de outubro, ás 11'00 horas, na Casa do Concello.

8-. O xurado das xornadas será designado polo comité organizador e estará presidido pola concelleira de Festas e Animación Sociocultural do Concello de Vigo ou persoa en quen delegue. Como vocais actuarán catro persoas de recoñecido prestixio, relacionadas co mundo da danza e da música tradicionais galegas, mailo director da agrupación gañadora da edición anterior. Como secretario/a actuará un/unha funcionario/a municipal designado/a polo comité organizador, con voz e sen voto.

9-. O xurado valorá de 0 a 10 puntos a cada agrupación, e terá como base fundamental os seguintes criterios: calidade artística dos bailaríns, grao de dificultade e autenticidade das danzas interpretadas e do vestiario utilizado, valor interpretativo do grupo de acompañamento. Será motivo de descualificación excederse dos cinco minutos establecidos para cada danza na base núm 6.

10-. O veredicto do xurado farase público ó remate da segunda xornada, e pasarán á fase final as seis agrupacións que obteñan maior puntuación e que volverán actuar con dúas danzas, o día 16 de novembro, e seguirán rigorosamente a orde inicial. En caso de empate resolverá o voto de calidade da presidenta do xurado.

11-. Os premios establecidos polo comité organizador son os seguintes:
1º premio: 1.500.- €, medalla e diploma.
2º premio: 900.- €, medalla e diploma.
3º premio: 600.- €, medalla e diploma.
4º premio: 300.- €, e diploma
5º e 6º premio: diploma.
Premio especial de 150.- €, e diploma ó mellor bailarín.
Premio especial de 150.- €, e diploma á mellor bailarina.
Premio especial de 180.- €, ó mellor grupo de acompañamento.
Os premios estarán suxeitos á normativa fiscal que sexa de aplicación. O comité organizador aboaraos, mediante transferencia bancaria, nos quince días hábiles seguintes á final das xornadas, así como os gastos de desprazamento. Co obxecto de realizar estes pagamentos, as agrupacións deberán achegar obrigatoriamente á solicitude de inscrición, unha fotocopia compulsada do CIF e unha certificación bancaria.

12-. O veredicto final do xurado farase público trala actuación das seis agrupacións finalistas e da correspondente deliberación. A continuación entregaranse os premios.

13-. O comité organizador aboaralle a cada agrupación participante de fóra do termo municipal de Vigo a cantidade de 240.- €, en concepto de gastos de desprazamento, e 120.- €, no caso das agrupacións da cidade. Así mesmo, aboaráselles estas mesmas cantidades de novo ós seis finalistas.

14-. A organización das xornadas declina calquera responsabilidade sobre os posibles accidentes ou danos que os participantes poidan sufrir durante a súa participación.

15-. A mera solicitude de inscrición nas xornadas supón a aceptación plena das presentes bases. Así mesmo, os veredictos do xurado serán inapelables.

16-. O comité organizador e o xurado quedan facultados para resolve-las posibles controversias ou dúbidas que poidan xurdir na interpretación das presentes bases, así como para tomar iniciativas que contribúan ó bo desenvolvemento das xornadas.

17-. O grupo gañador da presente edición das xornadas terá a obriga de tomar parte na final da vindeira edición como invitado e fóra do concurso, e recibirá a cantidade que se establece na base núm. 13; así mesmo, o/a seu/súa director/a participará como membro do xurado na vindeira edición, e non poderá ser substituído por ningunha outra persoa da agrupación.